Wala sang narekord nga untoward incidents samtang ginaobserbar ang All Saints Day, November 01, 2026.
Sa interview sang Bombo Radyo Bacolod kay Police Lt. Jared Elbanbuena, Assistant Station Commander for Operation sang Bacolod City Police Station 4, sa ila nga paglibot sa Burgos Cemetery wala man sang rekorded nga nagluntad nga insidente.
Suno kay Elbanbuena, malibot man sila sa Stone Hills Memorial Park kag iban pa nga mga public kag private cemetery nga yara sa Area of Responsibility sang Station 4.
Ginpahayag sini nga mag-ulan man ukon mag-init padayon ang ila nga paglibot kag pagbantay agud nga masiguro ang mga seguridad sang mga nagapadulong sa mga sementeryo nga nagabisita sa ila nga mga himata.
Dugang pa, nagpahanumdom man ini sa tanan nga mga pumuluyo nga magabisita sa patyo nga siguruhon ang mga balay ang nasirad-an kag na-lock antes maghalin kag magsunod sa mga pagsulundan kasubong man indi na magdala sang mga ginadumilian nga butang kaangay sang mga matalom nga bagay para sa seguridad sang tanan.
Samtang sa sulod sang patyo may yara sang nagtuob bangud sa pagpati sang mga katigulangan nga kinahanglan ini agud nga indi paghilason ang mga kabataan sa tion nga magpauli sa balay ang mga nagbisita sa ila mga minatay.
Sa tuob, ginabutangan ang baga sang incenso, kamangyan kag mga laya nga dahon agud nga magtuga sang ago.
