Nagdangat sa P665 million ang ginhatag sang Malacañang nga financial assistance sa mga local government units sa Negros Occidental nga may mga infrastructure damages bangod sa paglupok sang Bulkan Kanlaon kag Bagyo Tino.
Madumduman nga kahapon ang anibersaryo sang paglaslas sang Bagyo Tino sa probinsya nga nagpatay sang madamo nga mga Negrense.
Nagpadulong sa Malacañang si Negros Occidental Governor Eugenio Jose “Bong” Lacson agud batunon ang financial aid, gani wala ini nakatambong sa pagkomerar sang 128th Al Cinco de Noviembre ukon Negros Day.
Ang seremonya ang ginpangunahan ni President Ferdinand Marcos Jr.
Lima ka LGUs ang makabatun sang tig-P100 million nga bulig pinansyal nga ginalakipan sang La Carlota City, Binalbagan, La Castellana, Moises Padilla, kag Bago City.
Ang nasambit nga mga banwa kag ciudad ang nakareport sang major infrastructure damages bangod sa mga kalamidad kaangay sang pagkaguba sang mga taytay.
P90 million naman ang batunon sang Sagay City, P40 million ang Isabela, P20 million ang Cadiz City, samtang tig-P5 million naman sa Himamaylan City, Salvador Benedicto, kag Murcia.
Luwas sa Negros Occidental, nakabatun man sang infrastructure assistance ang Negros Oriental, kag iban pa nga mga LGU nga nahalitan sang mga kalamidad.
Kabug-usan nga P665 million ang nabaton sang probinsiya.
Indi paman maseguro ni Lacson kun ang kwarta ang idownload derekta sa LGUs ukon ipaagi sa Provincial Government.
Apang paathag sang gobernador nga ang financial aid ang indi para ihatag sa mga pumuluyo nga naapektuhan, kundi para sa reconstruction kag redevelopment sang mga naguba nga imprastraktura.
