Ginatutukan sang Department of Education–Negros Island Region (DepEd NIR) ang pagpasiguro nga magapadayon ang pagtuon sang mga estudyante bisan pa sa tunga sang mataas nga heat index.
Suno kay DepEd NIR Director Ramir Uytico, CESO III, nagpatigayon na sang separado nga mga orientation ang Education Support Services Division (ESSD) kaupod ang Disaster Risk Reduction and Management Office (DRRMO) team sa mga Division angot sa preparasyon sa nagakaeksperyensyahan nga high heat index.
Suno pa kay Uytico, may yara man sang mga preparasyon kag plano ang tagsa ka Local Government Unit (LGU).
Ginpaathag sini nga ang DepEd NIR ang magatutok sa teaching learning, agud masiguro nga indi madula ang oportunidad sang mga kabataan nga makatuon bisan pa kun kinahanglanon nga sila ang magpabilin sa ila mga balay.
Dugang pa ni Uytico, indi dapat mapabay-an ang pagtuon sang mga estudyante bangud lamang sa mataas nga heat index.
Ginpahayag man sini nga kaangay sang eksperyensya sang COVID-19 pandemic, indi dapat liwat nga magresulta sa pagkadula sang learning achievement sang mga kabataan ang sitwasyon subong.
Bisan indi face to face classes, dapat suno sa iya, may yara sa gihapon sang ginabasa ang mga estudyante sa ila balay.
Samtang, ginpahayag ni Uytico nga wala pa sang na-record nga insidente may kaangtanan sa high heat index sa mga estudyante.
Ginkilala sini ang kabudlayan sang mga manunudlo sa sini nga sitwasyon, gani ginpangabay sini pagbuligay sang tanan agud mapabilin ang kalidad sang edukasyon sa bisan ano nga kahimtangan.
