Opisyal na nga ginbuksan ang labing una nga Farm School Fiesta sang Department of Education Negros Island Region nga ginpatigayon sa Ayala Malls Capitol Central kahapon.
46 ka mga farm schools sa NIR ang nagbaton sang tig-P1million halin sa DepEd.
Sa mensahe ni DepEd NIR Director Ramir Uytico,CESO III, ginpahayag sini nga ang rehiyon ang may labing una nga 46 ka mga farm schools nga makabaton sang tig-P1million.
Ginpasalamatan sini si DepEd Secretary Secretary Sonny Angara sa pagsuporta sa programa.
Suno kay Uytico, importante ang farm school program sa pagpakigbato sa kapigadahon kag kagutom.
Dugang pa, isa ini ka pamaagi agud mas mapalapad ang oportunidad sa edukasyon kasubong man agud mahatagan sang pagtamod ang mga problema kaangay sang nagakaeksperyensyahan nga El Nino.
Pahayag sini, ang kadalag-an sang farm school ang nakadepende sa suporta sang Local Government Units (LGU) kasubong man sa kooperasyon sang mga manunudlo kag mga estudyante.
