Nabatun na sang duha sa mga winners sa grand draw sang Swerte sa Palengke 2026 ang ila nga premyo.
Si Shirly Frane sang Purok San Roque 1, Barangay Handumanan, Bacolod City, nga amo ang First Prize winner ang wala pa nakaclaim sang iya P25,000 bangod ini ang yara sa ospital.
Si Frane ang nagdaog paagi sa ginhulog nga proof of purchase sang San Miguel Beer.
Sa pihak nga bahin, malipayon nga ginbatun sang Second Prize winner nga si Mae Tolentino sang Bago Public Market ang iya P15,000 nga premyo.
Siya ang nagdaog paagi sa ginhulog nga proof of purchase sang Sarsaya.
Si Tolentino, 33 anyos ang may duha ka kabataan nga edad tatlo kag napulo ka tuig.
Siya ang nagatrabaho bilang tindera sng tinapayan, samtang ang iya bana ang isa naman ka electrician.
Ang nabatun nga premyo ang itigana sini bilang savings, para sa pag-eskwela sang ila kabataan.
Samtang natabuan man nga malapit na magsaulog sang kaadlawan ang naga-isahanon nga bata sang Third Prize winner.
Si Jenny Galas, 58 anyos, residente sang Purok Mainuswagon, Barangay Alijis, Bacolod City ang nagdaog sang P10,000 paagi sa ginhulog nga proof of purchase sang Efficascent Oil.
Ang iya bana ang nagabyahe sang trisikad, samtang sila ang may bugtong nga bata.
Suno diri, magaselebrar sang kaadlawan ang ila bata sa Nobyembre 11, kag hustuhan gid ang tion sang pagbatun sini sang premyo.
Pila ka bahin sang cash prize ang ibakal man sini sang kinahanglanon para sa balay, bayad sa tubig kag suga, kasubong man inugbakal sang maintenance nga bulong.
Dako ang kalipay sang duha kag ginapasalamat gid sa Ginoo ang nabatun nga bugay.
Ginapasalamatan gid nila ang mga sponsored products, kag ang Swerte sa Palengke Promo 2026.
Pangagda nila sa iban nga maghulog man sang entries sa mga promo sang Bombo Radyo kag Star FM.
Nahibaluan nga ginlunsyar na sang Domingo ang One Two Panalo Part 25 Promo.
