Ginalantaw nga matapos ang construction sa Command Center sa Enero 2027.
Sa interview sang Bombo Radyo Bacolod kay Dr Anna Maria Laarni Pornan, head sang City Disaster Risk Reduction and Management Office, ang construction sa 3-storey building ang ginpondohan sang local government paagi sa DRRM fund sa balor nga P110 million.
Ang ground floor ang malapit na matapos, samtang ongoing man ang constructions sa 2nd kag 3rd floor.
Ang ground floor ang hamtangan sang administrative office, registration area, kag training room.
Ang 2nd floor ang hamtangan sang command center, weather monitoring, kag CCTV monitoring room.
May ihamtang man diri nga mini conference room kun sa diin magameeting ang City officials kag Emergency Response Team sa tion sang mga kalamidad ukon dalagko nga aktibidad; kag may-ara man sang quarters para sa mga magatrabaho sa area.
Samtang sa 3rd floor may-ara man sang dugang nga conference facility, quarters, kag rooftop.
Suno kay Pornan, ang ciudad ang magagastos sa construction, samtang ang High Data Infrastructure Corporation nga amo ang magatakod sang computer system kag iban pa nga equipments kag technologies.
Nahibaluan nga ang High Data ang may P2.1 billion Public-Private Partnership (PPP) project sa ciudad sang Bacolod.
Luwas diri, ang High Data ang nagaplano man nga magtakod sang 100 CCTV poles kag 240 CCTV camera sa nagkalainlain nga lugar.
Luwas diri, plano man nila nga ma-link bisan ang existing 30 tubtob 40 CCTV camera sa Bacolod City.
Samtang plano man nga i-link ang CCTV sa mga Barangay agud ma-access sang Command Center.
Suno kay Pornan, ini ang nahimo na nila sa Masskara Festival kun sa diin gin-mirror nila ang CCTV monitoring sa Bacolod City Police Office.
