Ginbag-o sang Bacolod City National High School ang schedule sang klase agud mahatagan gihapon sang kahigayunan ang pagpatigayon sang face-to-face classes.
Sa interview sang Bombo Radyo Bacolod kay Richard Gelangre, principal sang Bacolod City National High School, bangod sa Super El Niño, ginakahangawa nila nga magatayuyon na ang suspension sang face-to-face classes bangod sa high heat index.
Panindugan sini nga mas epektibo ang face-to-face classes kun ikumpara sa alternative delivery mode (ADMs).
Dugang pa ni Gelangre nga iban nga estudyante ang wala sang internet kag indi maka-online ukon indi maka-access sang group chat.
Agud may-ara gihapon sang face-to-face classes, nagdesisyon sila nga i-adjust ang klase, nga magasugod alas-6:00 tubtob alas-10:30 sang aga.
Samtang Alternative Delivery Mode (ADMs) naman sa hapon.
Sadto nagasugod ang klase alas-7:00 sang aga tubtob alas-3:00 sang hapon kag isa ka oras sa kada subject.
Sa karun, 50 minutos na lamang ang klase kada subject, samtang ginascheduling kun ano nga subjects ang malakip sa magapatigayon sang face-to-face classes kada adlaw.
Apang aminado si Gelangre nga mahimo sila ang may-ara pa sang mga adjustments.
Antes magdesisyon, ginmonitor anay nila ang room temperature sa classroom sa nasambit nga mga oras, kag natumod nga ini ang nagarange lamang sa 33 tubtob 34 degrees Celsius nga Heat Index.
Panindugan niya nga sa Alternative Delivery Mode (ADMs) madamo sang mga estudyante nga nagapawala sa pagtuon gani importante nga may-ara sang face-to-face classes.
Dugang pa niya nga sa order ni President Ferdinand Marcos Jr kag Department of Education, ginatugyan na sa mga school principal ang pagdesisyon tuhoy sa face-to-face classes suspension.
