Sa ikaduha nga adlaw sang pagpresentar sang testigo sang defense counsel sa impeachment trial ni Vice President Sara Duterte, ginpresentar nila nga ukaduha nga testigo si Island Garden City of Samal Assessor Engr. John Kenneth Enumerables agud maghatag sang testimoniya angot sa propedad nga gina-angot sa Bise Presidente kag sa iya bana nga si Atty. Manases Carpio.
Tinutuyo sang presentasyon sang depensa nga pamatud-an nga wala sang kamatuoran ang mga akusasyon sang prosekusyon nga wala gindeklarar ukon sala ang deklarasyon ni VP Sara sa iya Statement of Assets, Liabilities, and Net Worth (SALN) may kaangtanan sa propedad sa Samal, Davao del Norte.
Si Enumerables ang ikaduha nga nag-atubang sa witness stand matapos ni Davao City Assessor Engr. Jaime G. Adalin, nga ginbatikos sang mga senador bangod sa indi klaro nga mga sabat sa pamangkot.
Bangod sini, ginpamangkot ni Senator-Judge Vicente Sotto III si Presiding Officer Francis “Chiz” Escudero angot sa penalidad sa mga magabinutig sa atubang sang impeachment court, kun sa diin ginklaro ni Escudero nga mahimo i-contempt sang korte ang sin-o man nga magabinutig, luwas pa nga mahimo mangatubang sang kaso nga perjury kun ini ang ginfile sa regular court.
Samtang, ginkumpirmar ni Island Garden City of Samal Assessor Engr. John Kenneth Enumerables nga si Atty. Manases Reyes Carpio, bana ni Vice President Sara Duterte, ang nakarehistro nga tag-iya sang propidad sa pungsod.
Sa direct examination ni defense lawyer Atty. Lindon Bacquel sa ika-41 nga adlaw sang impeachment trial, ginpamangkot niya ang witness kun kay sin-o nakarehistro ang propedad.
Derekta naman nga ginsabat ni Enumerables nga si Carpio ang registered owner.
Sang ginpamangkot naman kun diin makit-an ang propedad, sabat sini nga sa Barangay San Isidro, Kaputian District, Island Garden City of Samal, Davao del Norte.
Samtang gintindugan ni House private prosecutor Atty. Jay Tolosa nga lain ang mga detalye sang mga propedad nga ginatalakay sa trial angot sa propedad sa Matina, Davao City nga nangin focus sa mga pamangkot subong nga ika-41 nga adlaw sang Impeachment Trial.
Suno kay Tolosa, base sa mga nakasaad sa transcript of stenographic notes ukon TSN, may dako nga kinalain sa duha ka propedad nga indi mapamatud-an sang karun nga testigo nga ini ang isa lamang.
Pahayag sini nga ang mahambal lamang niya nga isa lamang ka barangay ang nasambit nga propedad.
Apang wala paman natapos ni Tolosa ang iya paathag, nagsabat na si Defense counsel Atty. Lindon Bacquel.
Ginhingyo sini sa impeachment court nga istrike off sa record ang pahayag sang private prosecutor sa panindugan nga ini ang nagahatag na sang testimoniya.
