Gamiton sa pagpakay-o sang mga taytay kag iban pa nga imprastraktura nga naguba sang paglaslas sang Bagyo Tino ang nabaton sang ciudad sang Bago nga P100 million nga financial assistance gikan sa national government.
Madumduman nga nagpadulong sa Malacañang si Negros Occidental Governor Eugenio Jose “Bong” Lacson kaupod ang pila ka alkalde sang iban pa nga Local Government Unit agud batunon ang financial aid.
P665 million ang ginhatag sang Malacañang nga financial assistance sa mga LGUs sa Negros Occidental nga may mga infrastructure damages bangod sa paglupok sang Bulkan Kanlaon kag Bagyo Tino.
Lima ka LGUs ang nagbaton sang tig-P100 million nga bulig pinansyal nga ginalakipan sang Bago City, La Carlota City, Binalbagan, La Castellana, Moises Padilla.
Suno kay Bago City Mayor Marina “Mayette” Javellana Yao, ang P100 million nga financial aid ang gamiton sa pagpakay-o sa tatlo ka mayor nga taytay sang ciudad nga naguba sadto sang Bagyo Tino lakip na ang iban pa nga imprastraktura.
Ginpasalamatan ni Yao ang nabaton nga bugay halin sa national government nga suno sa iya dako gid nga bulig sa iya mga constituents.
