Pabor ang mga ginikanan sang mga kabataan nga naga-eskwela sa Rizal Elementary School sa Bacolod City sa bag-o nga schedule sang klase agud makapatigayon sang face to face classes.
Nahibaluan nga sumugod kahapon ang klase sa buluthuan ang ginhimo na nga alas-6:00 tubtob alas-10:30 sang aga.
Sa interview sang Bombo Radyo Bacolod kay Rodlyn, residente sang Brgy Banago, siya ang may duha ka kabataan nga duha kag lima ka tuig.
Suno diri, mas pabor sila sa face-to-face classes sangsa modular learning bangod indi gid matutukan sang mga ginikanan ang pagtuon sang kabataan, indi kaangay kun may atubang sila nga manunudlo.
Apang nagahingyo si Rodlyn nga kun mahimo ma-adjust sa alas-6:30 ang klase.
Paathag sini nga maiwat ang salakyan kag madasig man nga mapuno, gani sa masami bisan alas-5:30 pa lamang yara na sa paradahan, sila ang makasakay lamang pasado alas-6:00 na sang aga.
Dugang pa nga ginpanubo sa 30 minutos ang klase sa kada subject, gani ang maabtan na lamang sang iya bata amo ang ikaduha nga subject.
Samtang pahayag naman ni Alyas Analyn, iloy sang Grade 3 pupil nga babayi, nga nagasunod lamang ini sa kun ano ang instruction sa ila sa group chat.
Pahayag sini nga mas pabor man ini sa face-to-face classes bangod sarang maka-discuss ang manunudlo sangsa modular learning.
Sila ang naga-istar sa Gardenville Subdivision sa Brgy Tangub, Bacolod City.
Wala naman ini sang problema sa pagpukaw sa iya bata bangod ini ang mahapos pukawon.
Samtang sila ang may tricycle man nga ginagamit sa pagdul-ong sa eskwelahan.
