Patay ang isa motorcycle rider samtang duha ang nasamaran matapos nga nabungguan sang nakasugata nga motorsiklo sa Purok Banga, Barangay Carol-an, Kabankalan City, Negros Occidental, Domingo sang gab-i, Nobyembre 15, 2026.
Sa interview sang Bombo Radyo Bacolod kay Police Lt. Col. John Ganzon, hepe sang Kabankalan City Police Station, ang aksidente ang nagluntad sa dalan padulong sa Barangay Carol-an kag duha ka motorsiklo ang imbulbado.
Ang Vehicle 1 amo ang itom nga Skygo 150 motorcycle ang ginamaneho sang 30-anyos nga lalaki nga kilala sa alyas nga “Rommel,” residente sang Sitio Talanyog, Barangay Carol-an, Ayungon, Negros Oriental kag ang Vehicle 2 ang itom nga Kawasaki Bajaj 125 motorcycle nga ginamaneho sang 41-anyos nga lalaki nga kilala sa alyas nga “Jim,” residente sang Barangay Carol-an Proper, Kabankalan City.
May angkas man ini nga 24-anyos nga lalaki nga kilala sa alyas nga “Bert,” isa ka laborer kag residente sang Sitio Comolocolo, Barangay Carol-an.
Suno kay Ganzon, ang duha ka motorsiklo ang nagabiyahe sa magkatuhay nga direksyon apang sang pag-abot sa Purok Banga, nagbungguanay ang mga ini.
Bangud sa impact, nakaagom sang samad si alyas Rommel kag si alyas Bert kag nagapaayo pa sa ospital samtang si alyas Jim ang napatay bangud sa pilas sa ulo.
Dugang sang hepe, wala naman sang suksok nga helmet ang mga imbulbado sa aksidente.
Wala naman sang ipasaka nga kaso bangud santo sa imbestigasyon may sala si alyas Jim bangud nagmaneho ini nga nakainum sang makahulubog nga ilimnon.
Sa karun, nagapangayo ang magtimbang nga bahin sang bulig bangud si alyas Jim ang napatay samtang ang isa nga si alyas Rommel ang conscious apang ginalantaw nga may malala nga samad bangud sa bali sa tiil nga sa karun nagapabilin sa Lorenzo D. Zayco District Hospital.
Suno kay Ganzon, nakadepende na sa duha ka pamilya nga imbulbado kung ano nga bulig ang mahatag sa kada isa.












