Ginpadayaw ni Department of National Defense Secretary Gilberto Teodoro Jr. ang mga benepisyo nga makuha sa bag-o nga kasugtanan sa depensa sang Pilipinas kag Australia, indi lamang sa pagpabaskog sang kapasidad sang militar kundi mangin sa seguridad, investment, kag pag-uswag sang ekonomiya sang pungsod.
Suno kay Teodoro, isa sa mayor nga katuyuan sang kasugtanan ang pagpasimple sang mga proseso sa idalom sang ginapatuman nga Philippines-Australia Status of Visiting Forces Agreement ukon SOVFA.
Sa baylo nga mag-agi sa madamo nga proseso kag magkatuhay nga permiso antes mapatigayon ang isa ka aktibidad, ginalauman nga mas madasig ang koordinasyon kag pagbinuligay sang duha ka pungsod.
Sa amo nga paagi, mabuhinan ang mga kinahanglan nga proseso ukon ang ginatawag nga red tape, gani gilayon nga matigayon ang joint activities sang ila mga pwersa militar
Dugang pa sang tiglikom nga kabahin ini sang pagduso sang soberanya sang Pilipinas sa idalom sang pagpamuno ni President Ferdinand Marcos Jr.
Ginalauman man nga mas madasig ang pagbulig kag pagresponde bangud natalakay kag napreparahan na sang Pilipinas kag Australia ang mga posible nga kinahanglan sang mga maapektohan.
Suno kay Teodoro, ginalantaw man nga makabulig ang ang mas mapag-on nga defense partnership sa pagpabaskog sang investor confidence.
Madumduman nga ginpirmahan sang Nobyembre 15 ang bag-o nga Defense Cooperation Arrangement (DCA).












