Ginpasalamatan ni Governor Eugenio Jose “Bong” Lacson ang mga opisyales sang probinsya sa iya nga State of the Province Address kahapon sang hapon.
Sa SOPA nga ginpatigayon sa Provincial Capitol kahapon, ginpasalamatan ni Lacson ang mga department heads; mga alkalde kag opisyales sang mga ciudad kag munisipalidad sa Negros Occidental; Sangguniang Panlalawigan sa pagpamuno ni Vice Governor Jeffrey Ferrer; Economic Adviser Albee Benitez; kag mga empleyado sang Kapitolyo.
Suno kay Lacson, madamo ang nalab-ot sang subong nga administrasyon kag iya ginapasalamatan ang tanan sa pagkooperar kag pag-ubra sang ila tagsa-tagsa ka mga responsibilidan para sa ikaayo sang probinsya.
Aminado ang gobernador nga yara sa karun ang tanan sa mabudlay nga tion bangud sa ginapangatubang nga pandemic apang nagapati ini nga kun nalampuwasan ang mga krisis sang una, sarang man subong nga mangin madinalag-un batok sa COVID-19.
Ginakabig man sini nga achievement ang pagpatukod sang molecular laboratory sa Teresita Lopez Jalandoni Provincial Hospital nga nakabaton na sang 9,258 ka mga specimens sa bulan sang Hunyo samtang 1,735 na ka mga specimens ang naproseso sang lab sa bulan sang Hulyo.
Ginpatpat man sini ang mga accomplishments sang Office of the Provincial Agriculturist, Provincial Veterinary Office kag Provincial Engineering Office, subong man ang mga programa kaangay sang Negrense Kadiwa sa Negros Food Terminal Market kag Negros Occidental Comprehensive Health Program (NOCHP).
Nagpanghangkat man si Lacson sa tanan nga padayon nga magsunod sa mga protocols kag magtuo lang sa Ginoo bangud nagapati ang gobernador nga may rason ang mga problema nga atun ginapangatubang.
