Dismayado ang Alliance of Concerned Teacher’s (ACT) Partylist sa pag-veto ni President Ferdinand “Bongbong” Marcos Jr. sa budget nga para kuntani sa mga benefits sang mga magaretiro nga manunudlo kag iban pa nga staff sa idalom sang Department of Education, kasubong man sa budget para sa regularization sang mga Contract of Service kag Job Order employees.
Sa interview sang Bombo Radyo Bacolod kay ACT Partylist Representative Atty Antonio Tinio, dismayado ang mga ini nga masobra P42 billion nga pondo nga para kuntani sa kaayuhan sang mga manunudlo ang ginveto sang Presidente.
Nahibaluan nga P1.015 trillion ang gintalana nga budget para sa DepEd subong nga 2026, nga amo ang may pinakamataas nga alokasyon.
Apang suno kay Tinio, sa bersyon sang House of Representative sang National Expenditure Program, may ara sang P32 billion nga para kuntani sa benefits sang mga magaretiro nga manunudlo kag school staffs.
Paathag sini nga ang pondo ang para kuntani mamonetize ang mga leave credits nga wala magamit sang mga empleyado sa ila nga pagretiro.
Samtang ang P10 billion ang natalana naman para sa paghire sang dugang nga empleyado sang gobyerno.
Pinaagi sini, madamo kuntani sang mga madugay na nga Contract of Service kag Job Order employees nga mahatagan na sang plantilla ukon mangin regular.
Kalakip na diri ang mga professor sa pila ka mga State Universities and Colleges (SUCs) nga tubtob sa karun nagapabilin lamang nga contractual ang status bangod sa kakulang sang plantilla.
Apang pagdangat sa Bicameral Committee ini ang budget nga yara kuntani sa NEP ang ginsaylo sa Unprogrammed Appropriations ukon sa mga programa nga ma-implementar lamang kun may available na nga budget.
Tubtob nga ini ang gin-veto nagid ni President Ferdinand “Bongbong” Marcos Jr.
Suno diri, madamo sang mas nagakadapat nga i-veto kaangay sang hundred billion pesos nga allocables sa mga Kongresista kag Senador.
Dugang pa sini nga dalagkuan gihapon ang mga confidential kag intelligence funds sang mga politiko nga masami nagaserbe nga bork barrel.
