Ginpanginwala ni President Ferdinand Marcos Jr ang alegasyon ni anay Philippine National Police kag sa karun Senator Ronald Dela Rosa batok sa karun nga administrasyon nga gin-alegar gintuyo nga dalahigon ang Senador kaupod sanday anay Presidente Rodrigo Duterte, Senator Bong Go, kag anay Criminal Investigation Detection Group chief Lt. Gen. Gerald Caramat nga yara sa likod sang ilegal nga POGOs sa pungsod.
Ginhimo sang Presidente ang paathag kasunod sang akusasyon ni Senator Dela Rosa batok kay Mary Ann Maslog nga isa ka scam suspect nga gin-alegar nga ginsugo siya sang Malacañang Palace agud papirmahon si Alice Guo sang isa ka affidavit agud nga tumuron siya kag sanday ex-PRRD nga yara sa likod sang POGO sa nangin hearing sang Senado sadtong Martes, Oktubre 8.
Apang sa isa ka interview sa Presidente sa sideline sa iya pagtambong sa ASEAN Summit sa Laos, ginpahayag ni President Marcos nga indi sini kilala si Mary Ann Maslog.
Madumduman nga naangot si Maslog sa 1998 textbook scam nga sa ulihi nabulgar nga ginpeke ang kamatayon sini agud nga malikawan nga makasuhan kag sa karun ang nagagamit sang pangalan nga Jessica Francisco.
Apang nabuking nga buhi pa ini matapos nga naaresto sang BI sadtong Setyembre 25 sang matukiban nga si Maslog kag Francisco ang isa lamang paagi sa ginpatigayon nga fingerprint matching.
