Nagplead sang “not guilty” si dismissed Bamban mayor Alice Guo alias Guo Hua Ping sa isa ka election offense nga ginfile batok sa iya sang Commission on Elections (Comelec) bangud sa ginaalegar misrepresention sini bilang isa ka Filipino sa 2022 mayoral election.
Suno kay Comelec spokesperson Atty. John Rex Laudiangco, nagsulod si Guo sang isa ka “not guilty” plea sa arraignment nga ginpatigayon paagi sa video conference sang Huwebes, Disyembre 5.
Ini ang ginkumpirmar naman sang abogado ni Guo nga si Stephen David.
Suno kay Comelec Chairman George Erwin Garcia, ang preliminary conference ang ginreset sa Pebrero kun sa diin ginalauman nga mangin physically present si Guo.
Ang kaso batok diri ang nagikan sa material misrepresentation complaint nga ginfile sang Commission on Elections sang Oktubre.
Suno sa Comelec, wilfully kag unlawfully nga nagkomiter si Guo sang material misrepresentation paagi sa pagfile sang iya certificate of candidacy para sa pagka-alkalde sang Bamban para sa May 2022 elections nga sa pagkamatuod, siya ang isa ka Chinese citizen kag isa ka residente sang Fujian, China.
