Aminado ang alkalde sa banwa sang Hinigaran nga ginhold sini ang business permit sang bularan sang uga ni Lucita Libria nga una na nga nagreklamo sa Bombo Radyo Bacolod.
Madumduman nga nakompleto na ni Libria ang tanan nga requirements gikan sa Barangay tubtob sa mga ahensya sang gobyerno kaangay sang DENR kag Sanitary permits, apang apisar nga ini ang napirmahan na ni Hinigaran Municipal Mayor Nadie Arceo, ini ang ginhold bangod sa complaint.
Ang complainant amo ang kaingod nga beach resort nga ginapanag-iyahan ni Arsenio Pagunsan nga gina-alegar paryente kag financier ni Arceo sa eleksyon.
Ginpadulungan mismo sang Bombo News Team ang lokasyon kag nakita nga may-ara man sang septik tank bilang waste disposal area ang buladan gani indi makalab-ot ang higko sa baybay, samtang swimming pool naman ang ginapaliguan sa beach resort.
Suno kay Arceo, bise alkalde pa lamang ini may-ara na sang ordinansa nga nagadeklarar sa lugar bilang tourism area, apang ginapangita pa sini ang dokumento.
Paathag sini nga wala ini sang mahimo sa mga daan na nga bularan sang uga sa lugar ilabi na nga wala man sang nagareklamo sa ila, apang indi na sini luyag madugangan pa ang daan nga problema.
Nagapati ang alkalde nga may conflict of interest bangod indi pwede nga magtuparay ang resort kag bularan sang uga.
Ginpaanggid sini sa merkado ang sitwasyon nga indi man pwede nga iupod ang mga nagabaligya sang utan kag meat vendors.// Pasalig sini nga sulbaron nila ang problema sa sulod sang isa ka semana.
Sa pihak nga bahin, pangitaan man nila sang masayluhan ang mga existing na nga mga bularan sang uga.
Apang sa pihak sini, naga-ibwal naman ang mga pumuluyo nga makatrabaho kuntani sa nasambitan nga negosyo ilabi na nga mayorya nga palangabuhian sa lugar ang pagpangisda kag ugahan.
