Plastado ang traffic plan para sa pag-abot kag installation ni Most Rev. Louie P. Galbines, D.D., bilang ika-pito nga Obispo sang Diocese of Bacolod.
Suno kay PMaj. Elmer Bonilla, pinuno sang Bacolod Traffic Enforcement Unit, preparado na ang mga traffic arrangements agud masiguro nga safe kag matawhay ang dalagan sang trapiko sa pag-abot sang bag-o nga Obispo sang Diocese of Bacolod.
Alas-11:00 kaina sang aga, ginsugat sang mga tumuluo si Bishop Louie Galbines sa Tanolo Bridge sa banwa sang Hinigaran para sa iya nga ceremonial first step.
Para sa Solemn Reception nga pagahiwaton subong, alas-3:00 sang hapon tubtob alas-6:00 sang gab-i, sarado temporaryo ang pila ka dalan sa ciudad.
Lakip diri ang Gonzaga Street, Gatuslao Street kag Rizal Street.
Samtang sa Canonical Installation ni Bishop Galbines bwas sa Martes, halin alas-6:00 sang aga tubtob alas-12:00 sang udto, sarado naman ang Galo Street, Gatuslao Street, San Juan Street, Rizal Street kag Gonzaga Street.
Ipatuman man ang drop-and-go system, kun sa diin ang mga salakyan ang tugutan lamang nga magpa-naog sang mga pasahero malapit sa venue. Pagkatapos sini, kinahanglan gilayon nga magkadto ang driver sa designated parking area.
Ang mga delegado halin sa Central tubtob South Vicariates ang maga-park sa Sacred Heart Seminary–Bacolod, samtang ang mga gikan sa North tubtob Central Vicariates ang magapark sa Redemptorist Church.
Ginapangabay sini ang tanan nga magsunod sa traffic advisories agud mangin matawhay ang pagpatigayon sang duha ka importante nga seremonya.
Ang Diocese of Bacolod naghingyo man sa mga katoliko nga mag-upod sa pagpangamuyo para kay Bishop Galbines kag sa bug-os nga diocese.
