Nagpanawagan ang alkalde sa banwa sang La Castellana sa mga residente nga pangamuyuan nga wala sang magluntad nga magmatic eruption sa Bulkan Kanlaon.
Madumduman nga ginpahayag sang Phivolcs – Negros Occidental nga yara ang posibilidad nga may magluntad nga magmatic eruption matapos marecord ang pinakataas nga lebel sang sulfur dioxide humalin sang 2009.
Ulihi nga may nagluntad nga magmatic eruption sa Bulkan Kanlaon sang 1902.
Sa interview sang Bombo Radyo Bacolod kay La Castellana Mayor Alme Rhumyla Nicor-Mangilimutan, activated na ang ila nga incident management team kag ginpaalerto naman sini ang tanan nga Barangay.
Suspendido man ang face to face classes humalin pa lamang sang Setyembre 10 sang gab-i kag nahanda naman ang evacuation centers.
Suno kay Mangilimutan, sila ang nagahulat lamang sang abiso gikan sa Phivolcs kag wala naman sang nagapuyo sa sulod sang 4 km radius Premanent Danger Zone sang Bulkan Kanlaon bangod ang 10 ka pamilya ang wala pa makabalik humalin sang mag-evacuate sang Hunyo 3.
Ang iban ang ginpili naman nga magpuyo sa ila mga himata sa gwa sang 4 km radius.
Pasalig sang alkalde nga wala man untat ang komunikasyon sini sa Department of Social Welfare and Development (DSWD), Office of the Civil Defense (OCD) kasubong man kay Negros Occidental Governor Eugenio Jose ‘Bong’ Lacson.
Samtang panawagan man sini nga likawan ang magpost sang fake news sa social media nga sarang makatuga sang panic.
