Ginalauman sang alkalde sang banwa sang San Enrique, Negros Occidental nga makit-an nga buhi si Captain Elimar Jucal.
Si Jucal ang kapitan sang M/V Devon Bay nga naglugdang sang Enero 23.
Ang cargo ship may karga nga 55,000 tones iron ore kag nagbyahe gikan sa Zamboanga Del Norte padulong sa Guangdong, China apang naglugdang ini malapit sa Scarborough Shoal.
Sa interview sang Bombo Radyo kay Jilson Tubillara, alkalde sang banwa sang San Enrique, kilala sini ang pamilya ni Jucal bangod ang pakaisa sini nagatrabaho sa City Engineers Office, samtang ang amay naman sini ang anay police sa Negros Occidental Police Provincial Office.
Suno diri, may duha ka utod nga lalaki si Jucal nga lunsay mga seafarers man.
Samtang, sa karun padayon ang koordinasyon sang asawa ni Jucal sa PCG sa padayon nga search and rescue operation.
Suno pa kay Tubilllara, may tatlo ka bata si Jucal nga lunsay naga-eskwela pa kag sila nga magpamilya may balay sa ciudad sang Bacolod.
Pahayag sang alkalde, dako ang paglaum sini nga buhi pa si Jucal bangod kun kaisa may insidente nga may nagakarescue sa kadagatan nga isa ukon duha ka bulan nga nadula apang nakit-an nga maayo ang kahimtangan.
