Nagpanugyan ang alkalde sa banwa sang San Enrique nga ilubong nalang ang baboy samtang temprano pa kun may senyales na sang African Swine Fever (ASF) agud indi na maglapta ang virus.
Madumduman nga ginkumpirmar ni San Enrique Mayor Jilson Tubillara nga may kaso sang ASF sa ila nga banwa matapos magpositibo ang mag blood samples sang mga baboy nga ginpadala sa nagkalain-lain nga laboratories.
Sa interview sang Bombo Radyo kay Tubillara, ginpahayag sini nga ginsapol niya ang mga veterenarian sa ila nga banwa kaupod ang Department of Agriculture (DA) agud diskusyunan kun ano ang dapat nga himuon angot sini.
Suno sa Alkalde, ginatudloan nila ang mga hog raisers nga butangann sang disinfectant ang mga ginatapakan agud makontrol ang paglapta sang virus.
Suno diri, ginapanugyan man sini nga dapat indi pagdamoon ang tawo nga nagabisita sa baboyan agud mapanubo ang contamination.
Dugang pa sini, nagmando man siya paagi sa Executive Order nga ang boundary sa banwa ang butangan sang checkpoint sa nagapasulod kag nagapagwa sang baboy.
Suno kay Tubillara, ilain man dapat ang mga baboy nga wala pa sang senyales sang ASF kag kun mahimo ihingagaw nalang paihaw.
Ini agud indi matam-an ang mga hog raisers sa halit sang ASF kag mapadasig ang recovery.
