Nagpanawagan ang alkalde sang ciudad sang Bacolod sa mga residente nga magkooperar sa pagsulundan nga ginapatuman sang city government agud nga matapna ang coronavirus disease.
Ini ang apela ni Mayor Evelio Leonardia matapos nga marekord ang ikasiyam nga pasyente sang COVID sa Bacolod.
Ang 65-anyos nga babayi nga residente sang Purok Bayanihan, Barangay Banago ang nagsuprer sang ubo sang Abril 3 kag nagpakonsulta sa City Health Office sang Abril 17.
Ang swab test ang ginhimo para sa PCR testing kag ginpadala sa Iloilo Bio Lab sang Abril 21.
Si Patient No. 9 ang naga-istar sa iya nga balay kag wala sang history of travel.
Isa ini kag TB patient kag sa karun magapatigayon pa sang ikaduha nga test agud iverify ang result.
Aminado naman ang bise alkalde sang Bacolod kag pinuno sang Inter-Agency Task Force nga indi maayo nga balita nga nagdugang ang positibo nga kaso sang COVID sa ciudad.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga ginbisitahan na sang personnel sang City Health Office ang lugar agud maghinun-anon sa punong barangay kaangot sa nagpositibo nga residente sini.
Ginkuhaan naman sang swab test ang mga immediate family member ni Patient #9 kag ang mga posible nga nacontact sini.
Sa personal nga paglantaw sini, dapat ipaidalom ang mga tawo sa polymerase chain reaction (PCR) ang mga tawo nga nagasuprer sang pulmonary illness kaangay sang tuberculosis (TB) bangud nanotisyaran sini nga kalabanan nga nagapositibo ang may balatian kaangay sini.
Lantawon niya pa man ang rekommendasyon sang Department of Health matapos ang evaluation kag actual checking sa lugar kaangot sang paglockdown sa barangay.
Samtang, ginatugyan niya lamang sa alkalde ang pagdesisyon sa pag-extend sang ECQ sa ciudad.
Suno diri, indi man makadecisyon dali-dali ang ciudad sa pag-extend sang ECQ bangud nagpapanaog na sang mando ang Department of Interior and local government nga nagakinahanglan na sang rekomendasyon sang ahensya ang pagpalawig sang ECQ kag nagalaom man ini nga indi na madugangan ang kaso sang COVID-19 bangud isa ini ka dako ini nga factor sa desisyon sang alkalde angot sa pagmodify ukon extend sang ECQ.
