Nagalaum ang alkalde sa ciudad sang Cadiz nga makit-an nga buhi ang crew member sang M/V Devon Bay nga si Jejanfer Partosa Marfa nga namissing matapos nga maglugdang ang amo nga barko sa malapit sa Scarborough Shoal.
Sa interview sang Bombo Radyo kay Cadiz City Mayor Salvador ‘Bading’ Escalante, nakig-angut na ang social welfare office sa pamilya ni Marfa kahapon agud nga mahibaluan kun ano pa gid ang mahatag nga bulig sa ciudad.
Suno kay Escalante, gintutukan nila subong ang padayon nga komunikasyon sa kompanya sang nasambit nga barko agud nga gilayon mahibaluan ang update sa biktima.
Ginpasiguro sang alkalde nga hatagan sang pagtamod sa ciudad sa pamilya ni Marfa kag sila ang handa nga maghatag sang bulig, kutob sa tanan nila nga masarangan para sa pamilya sang biktima.
