Patay ang isa ka ginaalegar drug pusher sa ciudad sang Silay matapos ginapahayag magbato sa mga pulis nga nagpatigayon sang buybust operation, Biyernes sang hapon.
Suno sa hepe sang Silay City Police Station nga si Police Major Rollie Pondevilla, ang subject nga si Ronelo Morillo ang nabaklan sang tres mil pesos nga balor sang suspected shabu samtang yara sa balay sang tattoo artist nga si Reynaldo Deonila sa Purok Kape, Barangay E. Lopez, pasado ala-1:00 sang hapon.
Apang sang namutikan ni Morillo nga pulis ang iya katransaksyon suno sa hepe, siya ang nagdalagan.
Suno kay Pondevilla, ginpadulog sang police poseur buyer si Morillo apang sa baylo nga magpundo, ginapahayag nga nagpalupok ini sang armas.
Bilang kabahin sang self-defense suno kay Pondevilla, napilitan ang pulis nga tiruhon si Morillo.
Bangud sa madamo nga pilas sa nagkalain-lain nga bahin sang lawas, gilayon nga ginbawian sang kabuhi si Morillo.
Narekober sa possession sini ang .38 caliber revolver.
Gindakop naman sang kapulisan si Deonila nga amo ang tag-iya sang balay kag priso sa karon sa Silay City Police Station.
