Patay ang isa ka ginaalegar miyembro sang CPP-NPA sa nagluntad nga engkwentro batok sa tropa sang 94th Infantry Battalion sa Sitio Bugo, Barangay Buenavista, Himamaylan City, Negros Occidental kahapon.
Sa interview sang Bombo Radyo kay Army Major Cenon Pancito III, tagpamaba sang 3rd Infantry Division sang Philippine Army, nagluntad ang engkwentro alas 3:30 sang hapon samtang nagapatigayon ang tropa sang combat operations kag nagdugay sang napulo ka minutos.
Suno kay Pancito, kapin pito ka mga NPA ang naka-engkwentro sang mga militar kag gilayon man nga nagwithdraw ang mga ini padulong sa Cabadiangan creek.
Wala naman sang may nasamaran sa bahin sang gobyerno.
Magluwas sa bangkay sa NPA nga sa karun wala pa sang identity, nakuha man sa lugar ang isa ka M1 Carbine Rifle, duha ka caliber sang .357 pistols kag mga personal nga kagamitan.
Suno sa tagpamaba, ginalauman nga subong nga adlaw, may pamilya nga magaclaim sang bangkay.
Nagpasalig man si Pancito nga magapatigayon ang mga militar sa pagpakigbato sa insurhensya agud masiguro ang kalinong kag kaluwasan sang mga pumuluyo sa komunidad.
