Handa nga makigkita ang Alliance of Concerned Teachers (ACT) sa author sang hagna nga magadula sang homework sang mga estudyante humalin sa kindergarten tubtob highschool.
Sa interview sang Bombo Radyo Bacolod sa secretary general sang ACT nga si Raymond Basilio, ginpalayag sini ang ila pagpamalabag sa House Bill No. 3611 nga gin-author ni Deputy Speaker Evelina Escudero.
Suno kay Basilio, nagalingin ang ila ulo kun anu gid ang luyag sang gobyerno bangud nga kun manubo gani ang standards sang mga graduates sila nga mga manunudlo ang ginabasol, apang luyag man sini nga dulaon ang paagi agud mapasanyog pa ang learnings sang mga estudyante.
Suno diri, ang pagpahimo sang homework sang mga estudyante ang indi bangud lamang sa luyag sang teacher kundi bangud nga may yara sila sang program of works nga dapat lab-uton kag pamaagi man ini agud nga mas madamo ang matun-an sang mga estudyante.
Sa argumento nga wala na sang tion ang mga estudyante nga makahampang kag maka-bonding sa ila pamilya bangud sang homework, ginpahayag ni Basilio nga mismo ang mga teachers ang nagakadulaan man sang tiempo sa ila pamilya.
Nagasuhestyon na lamang ang ACT nga i-review ang curriculum kag ihatag lang ang nagakaigo nga workload nga dapat matun-an sang estudyante sa gintalana nga period.
