Yara na sa karun sa kustodiya sang Escalante City Social Welfare and Development Office si alyas Jacob nga nagpamahog sang pagpangluthang sa Escalante National High School.
Sa interview sang Bombo Radyo Bacolod kay Negros Occidental Police Provincial Office spokesperson Police Captain Judesses Catalogo, gintutukan sang Escalante City Police Office ang kaso kag sila ang nagkoordinar sa school authority kag CSWDO tubtob nga natumod ang nagpamahog.
Apang wala na ang mga ini nagpagwa sang dugang nga detalye tuhoy sa menor de edad.
Madumduman nga nagtuga sang kahadlok sa mga ginikanan kag estudyante sang buluthuan ang pagpamahog matapos nga ini ang naglapta sa social media.
Ginpasalamatan man ni Catalogo ang ginhimo nga pagpost sang conversation sang tiya sang bata nga kasugilanon ni Jacob.
Madumduman nga ginpahayag sang bata nga dare sa iya sa hampang nga roblox ang pagpaniro, kag ini ang nagpahayag pa nga wala sang makapugong sa iya.
Gingamit pa sini nga rasun ang school shooting sa Tacloban City nga suno sa iya wala man napriso ang mga naniro.
Suno kay Catalogo, ginturn-over na nila sa CSWDO ang bata ilabi na nga wala paman ini nakakomiter sang krimen, kag ang mga social worker na ang magapatigayon sang counseling kag psychological intervention.
Ang eskwelahan ang magahatag man sang disciplinary action.
Suno diri, tun-an man kun may partisipasyon ang mga ginikanan sa kun paano maminsar ang ila nga bata.
Panugyan ni Catalogo sa mga ginikanan nga imonitor ang aktibidad sang mga kabataan sa social media, kasubong man sa mga ginahampang.
