Wala gid napunggan sang isa ka amay nga bag-o lamang nakarecover sa pneumonia ang paglamon sang kalayo sa iya balay sa Dawis, Prk Ramon Magsaysay, Brgy 14, Bacolod City kahapon.
Sa interview sang Bombo Radyo Bacolod kay Regie Doronilla, siya ang bag-o pa lamang nakarecover gikan sa pneumonia, gani tuman ka sakit para sa iya ang pag-atubang sa panibag-o nga trahedya.
Suno diri, siya ang may 10 ka kabataan, kag ang mga ini ang masami nga nagatipon sa iya nga balay kada adlaw upod sa iya mga apo.
Gani gintinguhaan gid sini nga masalbar ang balay paagi sa pagsugata kag pagpalong sa kalayo nga indi makadangat sa iya balay.
Apang bangod siya ang bag-o lamang gikan sa masakit, maluya pa ini kag ginahapo, gani wala gid sini masarangan ang naga-ibwal nga kalayo.
Suno kay Doronilla, apisar nga memorable para sa iya ang balay, ginapinsar na lamang sini nga ang mga kagamitan ang sarang lamang makita, samtang indi na makita kun kabuhi ang madula.
Gani ginpabay-an na lamang sini nga ginalamon sang kalayo ang balay nga masami ginatinguban sang iya pamilya.
