Ginpaidalom sa drug testing ang amay nga suspek sa pagpatay sa 17 anyos sini nga anak sa Fortuneville Subd., Brgy. Rizal, Sagay City, Negros Occidental, kahapon, Marso 09, 2026.
Ginkilala ang biktima nga si Precious Herry Balicuatro, 17 anyos samtang ang suspek amo si Joedin Braza, 41 anyos, kasado, tricycle driver, lunsay mga residente sa lugar.
Nahibaluan nga kahapon sang aga, hinali lang nga ginbutong sang suspek ang biktima kag gindala sa kwarto.
Nagsinggitan ang 17 anyos nga dalagita, nga nabatian sang lolo gani ini ang gilayon nga nagpadulong sa Sagay City Police Station.
Sa pagresponde sang kapulisan, malinong na ang palibot gani ginpwersa sang mga pulis nga mabuksan ang kwarto.
Didto naabtan nga nagahigda sa kama ang dalagita kag nagapaligo sa kaugalingon nga dugo.
Samtang ang suspek ang nagapungko naman sa kama kag nagakaurungan.
Gindala pa sa ospital ang biktima apang gindeklarar nga dead on arrival bangod sa na-agom nga pilas sa ulo.
Ang suspek ang nakahunong na sa karun sa Sagay City Police Station.
Pahayag sang amay nga nangutos ini bangod sa pagsabat-sabat sang iya nga bata gani nalampusan niya ini sang tubo.
Sa interview sang Bombo Radyo Bacolod kay Police Lt. Col. Alvimar Flores, hepe sang Sagay City Police Station, ginpaidalom na sa drug testing ang amay agud nga mahibaluan kun nagagamit sang illegal nga druga.
Suno kay Flores, ginapreparar naman sang mga kapulisan ang mga dokumento agud nga ipasaka ang kaso nga parricide batok sa amay.
Dugang pa sang hepe nga wala man sang criminal record ang suspect.
Ginakumpirmar pa sang kapulisan kun matuod ang pahayag sang himata sang biktima nga ini ang may ginatumar nga bulong para sa depression.
Ginkuhaan man sang specimen ang biktima agud mahibaluan kun ini ang ginhimuslan.
