Sa masunod pa nga semana magasugod sa pagpatuman sang 4-day workweek sa Negros Occidental Provincial Government Offices.
Sa interview sang Bombo Radyo Bacolod kay Negros Occidental Provincial Administration Atty Rayfrando Diaz, nadesisyonan sang Department Heads upod sa Progressive Alliance of Capitol Employees (PACE) nga sa Marso 16 na lamang umpisahan ang pagpatuman.
Ini bangod nakaplastar na sang mga programa sa subong nga semana kag indi man luyag ni Negros Occidental Governor Eugenio Jose “Bong” Lacson kag sang Department Heads nga ikanselar ang mga commitment na sa mga benefeciaries kag partners.
Sa Marso 16, alas-8:00 sang aga gihapon ang sulod sa trabaho bangod mabudlay para sa mga empleyado nga alas-7:00 sang aga bangod madamo pa sila sang gina-asikaso sa ila panimalay.
Samtang matapos naman ang duty alas-7:00 sang gab-i.
Suno kay Diaz, ginaseguro man nila nga macomply gihapon ang 40 hours workweek nga ginarequire sang Civil Service Commission.
Samtang bangod sa masami Biyernes ang pinakamasako ang trabaho bangod may ginalagas nga deadline, gani ginpili nila nga sa Lunes na lamang ang italana nga adlaw nga wala sang trabaho.
Suno kay Diaz, anad naman ang mga empleyado bangod napatuman naman nila ini sang magduging ang COVID-19 virus.
Ginpadayun man nila ang pagdul-ong sugat sa mga empleyado nga ginsuguran sang pandemic.
Ini ang nakabulig man sa mas temprano nga pagreport sa trabaho, kag benepisyo man sa mga empleyado bangod sa matipid sa pamasahe.
