Tuman ang kalipay sang amay sang Bagonhon boxer nga si James Palicte sang nangin gold medalist ang anak sini sa 2019 SEA Games.
Sa interview sang Bombo Radyo Bacolod kay Edmund Palicte, gintuad sini nga anom pa lamang katuig si James sang gintraining niya na ini bangud sa potensyal nga nakita niya sa iya anak.
Nagapasalamat sang dako ang iya amay bangud nakuha sini ang bulawan nga medalya apang antes pa sang boksidor makuha ang nasambit nga medalya, nahibaluan na sang amay nga magakampeon ini.
Gintuad man sang amay nga Palicte nga nagapanalaytay sa dugo sini ang pagkaboksidor bangud ang lolo ni James ang anay ASEAN champion.
Ginpasalamatan man sang amay ang LGU sang ciudad sang Bago bangud humalin pa sang una, wala sila ang ginapabay-an.
Kalakip man sa ginpasalamatan sini ang mga incentive nga nakuha sang anak sini.
