Ginpahayag sang amay sang nahit-and-run sa Lacson Street, Brgy Mandalagan, Bacolod City sang Marso 27 nga bawion man sini ang ginfile nga kaso kun buligan sila sang nakabunggo nga mapagwa sa ospital ang iya bata.
Ini bangod nagdangat na sa P2,175,061.92 ang ila nga balanse nga balayran para sa hospital bill kag professional fee.
Suno kay Diomedes Genovia Sr., isa ka bulan sa intensive care unit (ICU) sang Riverside Medical Center ang iya junior, kag luyag naman kuntani nila nga makagwa, apang sila ang indi pagbuy-an sang ospital tubtob wala nabayaran ang bill.
Suno diri, siya ang nagfile sang kaso sang Mayo bangod indi gid magbulig ang tag-iya sang nakabunggo nga volkswagen sedan nga si Renato Locsin.
Ini ang naghatag lamang sa ila sang umpisa sang P30,000 kag sila ang wala man naka-atubangay para sa settlement.
Kaangay sa pangabay ni Locsin, luyag man sini nga masaylo sa Regional Hospital ang iya nga bata matapos makagwa sa ICU.
Pahayag sang doktor nga may-ara man sang hospital-to-hospital connection, gani sarang gid masaylo ang pasyente, apang ini ang mahimo lamang kun mabayaran na ang billing.
Bangod wala sang plano nga magbulig si Locsin, napilitan ini nga maghire sang private lawyer, nga ginbayaran nila sang downpayment nga P20,000 nga gin-amut amotan sang ila mga himata.
Wala ini nagdangop sa public attorney’s office (PAO) sa kahangawa nga ma-impluwensyahan ukon mabayran sang gina-akusar.
Apang pasalig sang amay nga kun magsugot si Locsin nga mabuligan nga makagwa sa ospital ang iya bata, handa man ini nga i-atras ang kaso.
