Naghilibion ang amay samtang nagapanawagan sa naka-hit and run sa iya nga bata sa Sta Clara Heights, Phase 1, Brgy Mandalagan, Bacolod City nga Marso 27, 2026 nga mabuligan sila nga mabayaran ang bill sa ospital nga nagdangat na sa masobra P2.17 million.
Sa pagreklamo ni Diomedes Genovia Sr. sa Ipa-Bombo Ta segment sang Bombo Radyo Bacolod, ginpahayag sini nga ang iya bata nga si Diomedes Genovia Jr., 28 anyos, ang papauli na kuntani sa Brgy Dulao, Bago City gikan sa iya trabaho sa Brgy Mandalagan sang nabungguan ang iya motorsiklo sang volkswagen nga salakyan nga nakarehistro kay Renato Locsin.
Suno diri, nagpalagyo ang suspect, apang suno sa mga nakakita, ang bata ni Renato Locsin ang nagadrive sang salakyan.
Nagkadto man ang amay sa balay ni Renato sa Brgy 38, Bacolod City, apang pahayag sini nga driver nila ang nagadala sang salakyan sang nakabunggo, kag naghatag lamang sang P30,000.
Nagtinir sa intensive care unit (ICU) ang pasyente sa sulod sang masobra isa ka bulan, kag nagrecover na sa regular unit.
Apang sila kuntani ang sarang na nga marelease 15 ka adlaw na ang nakaligad, apang sila ang indi pagwaon tubtob wala masettle ang bill.
Nagdangat sa P2,175,061.92 ang ila nga nabilin nga balayran, sa gintingob na nga hospital bill kag professional fee.
Suno kay Genovia, ginbaligya na sini ang ila karbaw nga ginagamit sa pag-arado, baboy, kag bebe.
Samtang sa pagbuligay sang ila pamilya, nakabayad na sila sang masobra P900,000.
Suno kay Genovia, samtang nagalawig ang pagtinir sa ospital, mas nagadako nagid ang balayran.
Pahayag pa sang amay nga ginpatawag na sila sadto sang Bacolod Police Station 3 para kuntani sa settlement, apang si Genovia lang ang nag-abot.
