Nagdagsa ang mga ambulant vendors kag mga pumuluyo sa Bacolod Economic Highway sa Barangay Cabug kun sa diin kalabanan sa mga nagabaligya diri ang wala sang business ukon sanitary permit.
Sa interview sang Bombo Radyo Bacolod kay Punong Barangay Jennifer Pintucan, ang mga ambulant vendors ang nagaplastar sang ila baligya sa sidewalk kag iban diri ang nagaplastar malapit sa dalan nga delikado.
Suno kay Pintucan, nangayo na ang City Legal Office sang business permit sang mga ambulant vendors apang wala sila sang may mapakita.
Sa pagtsekyar sini sadto, 30 pa lamang ka mga vendors ang nagaplastar sa lugar apang nagdangat na ini sa karun sa 60.
Nangayo naman sang business clearance ang mga vendors apang wala ini naghatag bangod nga sa sidewalk sila nagaplastar sang ila baligya.
Gin-abisuhan man ini nga siguraduhon nga indi illegal ang pagbaligya sang mga vendors kag kun mahimo nga magplastar na lamang sila sa pribado nga duta apang sa iya nga pag-istorya sa tag-iya sang private property, wala ini nagpasugot.
Sa karun, padayon nga ginapatsekyar ni Pintucan ang area sa mga barangay tanod kag kapulisan nga indi magbaligya ang mga vendors malapit sa dalan sa kahangawa nga may yara sang masideswipe sang mga salakyan kag motorsiklo agud malikawan ang mas dako nga problema.
