BACOLOD CITY-Ginpasakaan na sang kaso administratibo ang gin-relieve sa pwesto nga anay commander sang Bacolod Police Station 3 nga si Police Major Ruel Culanag.
Ini ang ginkumpirmar ni Bacolod City Police Office (BCPO) spokesperson Police Lt. Colonel Ariel Pico kasunod sang gin-relieve sa pwesto si Culanag matapos nga napalagyuhan sang apat ka mga priso ang Police Station 3 nagligad nga Enero 6, 2020.
Sa karun, naga-duty si Culanag sa BCPO headquarters apang wala ini sang posisyon kag suno kay Pico, ginahulat nila ang mangin desisyon sang legal division sang Police Regional Office (PRO) 6 sa kaso sini.
Ginpaathag ni Pico nga command responsibility ni Culanag ang pagpalagyo sang apat ka mga priso nga ginkilala nga sanday Sunny Capa; Ely Lorence, 22, sang Barangay 3; Michael Penoso, 25, sang Barangay 2, nga nagapangatubang sang kaso nga paglapas sa RA 9165 ukon Comprehensive Dangerous Drugs Act of 2002 kag si Jeffrey Elangos, 38, sang Barangay Banago, nga nagapangatubang naman sang child abuse charges.
Nakabalik na sa prisuhan ang apat, kag madumduman nga sa Bombo Radyo Bacolod pa nagpabulig si Peñoso para sa pagsungka sini.
