Patay ang isa ka lalaki sa banwa sang Binalbagan, Negros Occidental matapos gintiro sang gina-alegar riding in tandem suspects.
Sa interview sang Bombo Radyo Bacolod kay Police Major Fernando Somblingo, hepe sang Binalbagan Municipal Police Station, nagluntad ang shooting incident sa 1st Street, Barangay Progreso.
Ginkilala ang biktima kay Lester John Belbar, 41 anyos, pamilyado kag residente sang nasambit nga lugar.
Suno kay Somblingo, isa pa lang katuig ini nga nakapauli sa Pilipinas bangud nagatrabaho siya sa luwas sang pungsod kag luyag naman kuntani nga magbalik apang wala madayon bangud sa pandemya.
Suno sa hepe, ang biktima ang yara sa gwa sang ila balay samtang nagagamit sang iya cellular phone sang hinali lang ginluthang sang wala makilal-an nga suspetsado kag gilayon man nagsakay sa motorsiklo.
Narekober sang otoridad ang lima ka basiyo sang 9MM caliber pistol sa lugar sang insidente.
Santo sa inisyal nga imbestigasyon, mismo ang iloy sang biktima ang nagaduda nga nagagamit ini sang iligal nga droga bangud masami ini nga nagapulaw kag ang mga barkada sini ang yara man sa listahan sang mga street level individuals sang iligal nga droga sa banwa sang Binalbagan.
Ginalantaw man sang police nga anggulo sa imbestigasyon sa kamatayon sang biktima ang daan nga hiligut-anon kag drug related.
