Liwat nga nadakpan sa pagbaligya sang illegal nga droga ang 45 anyos nga drug personality sa Sitio Lupa, Barangay Guinhalaran, Silay City, Negros Occidental.
Sa interview sang Bombo Radyo Bacolod kay Police Lt. Col. Mark Anthony Darroca, hepe sa Silay City Police Station, ang subject sa drug buybust operation ang ginkilala nga si Eric Ardenio, 45 anyos, single, wala sang trabaho kag residente sa nasambitan nga lugar.
Narecover sa paghinakop sini ang 13 ka sachet sang suspected shabu kalakip na ang buybust item.
Ang suspected shabu ang may ginabanta bug-at nga 26 grams kag may standard drug price nga P176, 800.
Suno kay Darroca, si Ardenio ang nadakpan na sadto sa pagbaligya sang illegal nga droga apang ini ang naka-avail sang plea bargaining.
Kasunod sini, ginpaidalum sa community-based drug rehabilitation program (CBDRP) ang suspetsado apang ini ang wala nakagraduate matapos magpositibo gihapon sa drug test.
Bangod liwat nga nadakpan, si Ardenio ang natalana mangatubang sang kaso sa paglapas sa section 5 kag 11 sang Republic Act 9165 ukon comprehensive dangerous drugs act of 2002.
Panawagan naman ni Darroca sa mga Silaynon nga updan ang kampanya batok sa illegal nga droga kag ireport kun may nahibaluan nga nagabaligya ukon nagagamit sini.
Paathag sini nga halos tanan nga Barangay sa Silay City ang drug-cleared na gani ginatinguhaan gid nila nga mamentinar ang status, kag madakpan kun may-ara pa sang nabilin nga durugista.
