Nagpatigayon sang parada ang Andres Bonifacio Elementary School 1 sa ila pagbukas sang Brigada Eskwela 2024 kaina sang aga.
Sa interview sang Bombo Radyo Bacolod kay Arnel Areola, principal III sang ABES 1, sila ang naglibot sa kaingod nga mga Barangay agud mapaalinton nga nag-umpisa na ang isa ka semana nga Brigada Eskwela nga nagsugod subong nga Hulyo 22 kag magatakop sa Hulyo 27.
Aminado si Areola nga nakibot ang mga Barangay sa parada apang una na nga nagcommit nga magpadala sang work force ang Barangay 4 kag 6, samtang sila ang magahimo man sang scheduling sa tagsa ka Barangay ilabi na nga ini ang ginalauman nga madugangan pa.
Madamo man sang mga ginikanan kag volunteers kaangay sang grupo sang mga riders nga nag-upod sa una nga adlaw sang Brigada Eskwela samtang yara man ang representative sang Philippine Amusement and Gaming Corporation (PAGCOR) nga naghatag sang financial support.
Ang PAGCOR ang nagpasalig man nga magabulig sa iban pa nga mga entertainment programs sang ABES 1 kalakip na sa natalana nga Alumni Homecoming sa Nobyembre.
Sa karun sila ang nakafocus sa sulod ang classrooms agud maseguro nga ini ang preparado nagid sa pag-umpisa sang klase sa Lunes.
Apang aminado man si Areola nga kulang ang isa ka semana nga Brigada Eskwela, gani nakaligad palang nga semana, gin-unahan na sang mga manunudlo kag job order sa eskwelahan ang pagpaninlo.
Nagasegi man ang ila enrollment kag pasalig sang principal nga ang eskwelahan ang mabatun gid sang mga kabataan nga luyag mag-eskwela.
