Ginkompirmar sang Emergency Operations Center Deputy for Medical Services sang Bacolod City nga may yara na sang centralized cold room para sa COVID-19 vaccine ang syudad.
Sa interview sang Bombo Radyo kay Dr. Chris Sorongon, ginpahayag sini nga may designated area na nga gintalana ang syudad para butangan sang cold room para sa COVID-19 vaccine.
Suno diri, isa lang ang centralized cold room para sa bakuna kag ini ang igabutang sa annex sang Bacolod Government Center malapit sa City Disaster Risk Reduction Office.
Suno kay Sorongon, ang nasambit nga pasilidad ang sarang makatago sang isa ka milyon nga doses sang bakuna.
Gindesign man ang cold room para sa nagkalain lain nga bakuna nga magaabot sa syudad kag makamintinar sang 2 to 8 degrees centigrade nga temperatura para sa AstraZeneca.
Kasubong man nga makamintinar sang -50 tubtob -80 degrees centigrade nga temperatura nakadepende sa kinahanglanon sang bakuna.
Sa adlaw sang pagpangbakuna, diri kuhaon ang tanan nga supply agud dal-on sa vaccination centers.
Ini ang pagpanghanda sang syudad para sa pag-abot sang bakuna kag agud man mapabilin ang potency sini.
Ginkompirmar man ni Sorongon nga sa meeting nila sang tinalikdan nga adlaw ginmanduan na ni Bacolod City Mayor Evelio “Bing” Leonardia ang City Engineering Office sa pagpatukod sini kag natalana nga umpisahan ang pagubra sang Centralized Cold Room sa madason nga semana bilang pagpanghanda nga basi sa madason nga bulan maabot na ang gin pre-order nga bakuna.
