BACOLOD CITY — Ginpasiguro sang Philippine Drug Enforcement Agency Region 6 nga masarangan nila ang kampanya kontra iligal nga druga bisan sila lang.
Ini ang kasunod sang pahayag kahapon ni Presidente Rodrigo Duterte nga indi na magpatigayon sang anti-drug operations ang Philippine National Police kundi PDEA nalang.
Nahibaluan nga isa ka memorandum ang ginpirmahan ni Duterte sang Martes nga nagamandu sa PNP, National Bureau of Investigation, Armed Forces of the Philippines kag iban pa nga ahensya sang gobyerno nga itugyan na sa PDEA ang war on drugs sang administrasyon.
Sa interview sang Bombo Radyo, ginpahayag ni PDEA Region 6 Director Wardly Getalia nga masarangan nila ang anti-drug war bisan kulang pa sila sang personnel.
Wala pa sang guidelines diri suno sa iya apang kaangay sang kinaandan, magapakig-angot man sila gihapon sa iban nga ahensya sang gobyerno kaangay sang PNP.
Ang PDEA Region 6 ang may 45 tubtub 50 ka mga personnel kun sa diin 35 diri ang mga agents kag 10 ang na-assign sa Negros Occidental.
Sa pihak sini, aminado si Getalia nga madugangan pa ang mga personnel bangud padayon sa karon ang training sang bag-o nga mga drug enforcement officers.