BACOLOD CITY — Mas alarming ang sitwasyon sang iligal nga druga sa ciudad sang Bacolod kag probinsya sang Negros Occidental kun ikumparar sa isla sang Panay.
Ini ang pahayag sang Philippine Drug Enforcement Agency Region 6 kasunod sang pagpanguna sang Bacolod City Police Office sa Western Visayas sa anti-drug operations.
Sa interview sang Bombo Radyo, ginpahayag ni PDEA Region 6 spokesperson David Garcia nga mas madamo ang numero sang operasyon sang ahensya sa Negros Occidental kun ipaanggid sa Iloilo kag iban nga probinsya sa Panay.
Diri man nagahalin ang iban nga supply nga nagalab-ot sa Panay bangud nagaserbe ini nga transhipment point sang druga nga halin sa Mindanao kag Cebu.
Ang illegal drugs suno kay Garcia ang nagalabay sa pantalan sa San Carlos.
Ginapasalamatan naman ni Garcia nga nagabulig na sa karon ang mga pumuluyo sa anti-drug campaign paagi sa paghatag sang impormasyon.
