Arestado ang isa Persons With Disability matapos makuhaan sang armas-luthang sa Purok 4, Barangay Gomez sa banwa sang Pontevedra, Negros Occidental sang Enero 31.
Ginkilala ang nadakpan nga si Gina Isiderio, 46-anyos, isa ka apa (Mute) kag nagapuyo na sa karun sa banwa sang Pontevedra apang anay residente sa ciudad sang Silay.
Sa interview sang Bombo Radyo Bacolod Police Major Romulo Gepilango, hepe sang Pontevedra Municipal Police Station, may yara sang nagtawag sa ila concerned citizen agud nga magpahibalo sa ila nga may yara sang isa ka tawo nga nagapanglakaton nga may dala armas-luthang kag sang nagresponde ang mga kapulisan sa banwa sang Pontevedra naaktuhan nila si Isiderio nga nagauyat sang armas-luthang.
Suno kay Gepilango, kun indi siya magsala, si Isiderio ang may yara sang blotter report sa police station nga nagpanaya ini sang armas-luthang sa ila nga lugar.
Nakuha sa paghinakop sini .38 caliber revolver apang gindala ini sa crime lab agud nga mahibaluan gid kun ano ini nga klase sang armas-luthang.
Suno sa hepe, sang ila na nga nadakpan si Isiderio, ginverify sang mga kapulisan ang police record kag didto nila nakita nga imbulbado ini sa pagpanghold-up sa banwa sang Pulupandan kag sang mga tinalikdan nga mga tinuig, ang PWD ang imbulbado man sa nagkalain-lain nga kaso sang pagpangawat.
Sa karun, nagapabilin naman si Isiderio sa paghinakop sa Pontevedra Municipal Police Station.
