Ginpahayag sang hinablos sang nasunugan nga dako na ang kalayo sang natalupangdan ang sunog sa Purok Masinadyahon, Barangay Pahanocoy, Bacolod City kagab-i.
Sa interview sang Bombo Radyo Bacolod kay Jebee Pagunsan, pagkatapos nila panyapon naglantaw ang mga ini sang TV sang natalupangdan sang iya bata nga lalaki nga dako na ang kalayo sa balay kun sa diin nag-umpisa ang sunog.
Suno kay Jebee, wala sang tawo sa balay sang tiya sini nga si Jeane Pagunsan nga ginhalinan sang kalayo.
Bangud nagalinupok na ang kuryente kag dako na ang kalayo, ginhingagaw sini nga makuha ang 80 anyos sini nga amay nga yara sa kwarto malapit sa nasunog nga balay.
Wala naman sang mga ini napunggan ang pagdako sang kalayo nga nagtupok sang ginalantaw nga apat ka balay sa ila nga compound kag naghingagaw na lamang sa paggwa sa ila balay kaupod ang amay sini, asawa kag duha ka mga kabataan.
Ginalantaw man sini nagdangat man sa isa ka oras ang nagluntad nga sunog antes napalong ang kalayo.
