BACOLOD CITY – Posible nga indi na makabalik sa eksplorasyon kag operasyon ang apat ka mga mining firms sa Negros Occidental durante sang Duterte administration.
Ini ang ginpahayag ni Mines and Geosciences Bureau (MGB) Negros Island Region Director Armando Malicse sa exclusive interview sang Bombo Radyo Bacolod.
Suno kay Malicse, mahatagan lamang sang Environmental Compliance Certificate (ECC) kag mapahanugutan lamang nga magmina ang isa ka mining firm kun mapamatud-an sang gobyerno nga indi ini makahalit sa dunang-manggad kag sa palibot.
Apang suno kay Director Malicse, bangud nahamtang malapit sa watershed ang mga minahan sa Negros kag bangud sa kampanya sang Department of Environment and Natural Resources (DENR), malayo nga mapahanugutan pa nga mag-operate ang mga ini.
Nahibaluan nga ang apat ka mining firms sa probinsiya nga may Mineral Production Sharing Agreement (MPSA) ang ginalakipan sang duha ka ginapanag-iyahan sang Vulcan Mining Industrial Corporation, Philex Gold Philippines, Inc. kag Selenga Mining Corporation nga lunsay nahamtang sa banwa sa Hinobaan kag ciudad sang Sipalay.
Apang suno kay Director Malicse, madugay na nag-untat sa eksplorasyon kag operasyon ang mga ini.
