Natumod na nga Bantay Dagat gid man ang apat ka suspect nga nagpaarak sang luthang sa fishing vessel sa Madridejos, Cebu, nga nagpatay sang isa ka mananagat gikan sa Victorias City, Negros Occidental.
Sa interview sang Bombo Radyo Bacolod kay Police Major Ian Macatangay, spokesperson sang Cebu Police Provincial Office, ginakabig na nga suspect ang apat ka Bantay Dagat matapos nga nagsanto ang statement sang duha ka witness sa pahayag sang mga sakay sang fishing vessel tuhoy sa desinyo sang baruto nga ginasakyan sang mga suspect.
Madumduman nga anom ang sakay sang fishing vessel kalakip na ang kapitan, sang sila ang ginlaot kag ginpaarakan sang luthang.
Napatay sa nasambitan nga trafing incident ang mananagat nga si Rex Dela Cruz sang Victorias City matapos maigo sang bala sa dughan.
Sa karun indi pa mabuyagyag ang pangalan sang mga suspect sa kahanginan samtang ginahulat naman ang resulta sang paraffin test agud matumod kun pila ang responsable sa mismo nga papaarak sang luthang.
Suno kay Macatangay, kumpirmado na nga bantay dagat ang apat apang wala pa matumod kun ano na sila kalawig sa serbisyo subong man ang rasun sa pagpangluthang.
Padayun pa ang ila pagpangita sang magamit nga ebidensya agud mapasaka ang kaso nga murder, samtang nagapanawagan man si Macatangay sa iban nga mahimo mangin witness ukon may impormasyon nga makig-angot sa Madridejos Municipal Police Station ukon mismo sa Cebu Police Provincial Office.
