JAPAN – Apat ka mga tawo ang patay kag 94 ang pilason matapos gintay-og sang mabaskog nga linog ang northeastern Japan kagab-i nga nag-uyog sang mga building 275 kilometros nagikan sa capital nga Tokyo kag ginatos ka libo ka mga pamalay ang nadulaan sang supply sang kuryente.
Suno kay Bombo correspondent Josel Palma, ang magnitude 7.3 nga lunog ang nag-igo sa baybayon sang Fukushima Region kag may kadalumon nga 60 kilometros antes ang tungang gab-i ukon alas-11:36 kagab-i.
Suno kay Japanese Prime Minister Fumio Kishida, apat ka tawo ang napatay samtang magapabilin naman ang gobyerno nga yara sa high alert bangud sa posibilidad nga magaluntad ang mas mabaskog nga pagtay-og sa masunod nga duha tubtub tatlo ka adlaw.
Suno sa Fire and Disasert Management Agency, 94 ka tawo ang napilasan lakip na ang apat nga seryoso ang injuries.
Nabatak naman ang tsunami warning sa northeast coast kag narestore na ang supply sa capital apang ang iban nga mga balay ang wala pa sang power supply.
Suno kay Palma, tuman kakusog ang pagtay-og kagab-i kun sa diin nakibot ini bangud pati ang kwadro sa kilid sang iya ginatulugan ang nahulog.
Ginabanta naman ni Palma nga nagdugay sang isa ka minuto ang pagtay-og sang duta.
Sa iban nga lugar suno kay Palma, 3 feet ang kataason sang balod apang wala man sang nagluntad nga tsunami.
