Nakabaton sang isa ka tumalagsahon nga report ang traffic police sa China tuhoy sa isa ka babayi nga nakit-an nagakabit-kabit sa likod nga bahin sang isa ka truck.
Gilayon man nga gintsekyar sang mga otoridad kag ila ginkumpirmar ang report nga lehitimo.
Madamo sang nakakita kag nakakuha sang video sa babayi nga nagakabit lamang sa metal bar sa likod sang nagadalagan nga pick-up truck, apang wala pa nahibaluan kun ano ang kabangdanan sang insidente.
Sa ila inisyal nga imbestigasyon, natukiban sang mga kapulisan nga ang babayi amo ang asawa sang driver sang nasambit nga salakyan.
Suno sa kapulisan, kumbinsido ang asawa nga nagapangbabayi ang iya bana gani nagdesisyon ini nga sundan ang iya bana agud madakop niya sa akto.
Nahibaluan nga nagbayad sang penalidad ang bana sa balor nga 200 yuan ukon kapin P1,800 sa kapaslawan nga tsekyaron ang iya nga truck antes maglakat.
Ang ini nga pinasahi nga istorya ang nagsikat sa Chinese social media kag gingamit sang mga otoridad bilang pahanumdom sa mga mag-asawa nga i-resolbar ang mga problema pinaagi sa pag-istoryahanay ukon counselling, sangsa ibutang ang kabuhi sa makatalagam nga sitwasyon.
