Luyag sang asawa ni Corporal Arnold Sumaribus nga magpasaka sang kaso batok sa suspek, ang suldado nga napatay matapos nga gintiro ni Sergeant Charlemagne Nabejet sa sulod sang military detachment sang 15th Infantry Battalion sa Brgy Manlucahoc, ciudad sang Sipalay, Negros Occidental sang Lunes sang gab-i.
Sa interview sang Bombo Radyo kay Madelyn Sumaribus, Martes sang kaagahon na sang nakabaton ini sang tawag gikan sa abyan sang iya bana nga yara man sa military detachment kag ginhambalan nga napatay si Arnold.
Gilayon ini nga nagbyahe padulong sa Negros Occidental kaupod ang iloy sang iya bana.
Suno diri, indi ini makapati nga gintiro ni Nabejet ang iya bana bangod sila ang kilalahay kag magkaingod lamang sila sa ila lugar sa Lanao Del Norte nga kun kaisa magkaupod pa sila nga duha magpauli gikan sa ila nga trabaho.
Nakabaton man ini sang impormasyon suno sa abyan sang bana sini nga sang Lunes naga-inom inom sila sa sulod sang military detachment kag nagtindog na si Arnold para magpauli na kun tani, apang may yara lamang sang gamay nga wala pag-intindihanay kag amo na nga nagluntad ang komosyon.
Nag-agaway pa ang armas-luthang ang duha apang natigayon nga gintiro ni Nabejet si Arnold.
Suno kay Madelyn, nagtawag ang asawa ni Nabejet sa iya para mangayo sang pasaylo kag aminado man ini nga wala siya sang kaakig sa asawa sang suspek apang indi sini mabaton ang sorry bangod tuman ka sakit para sa iya ang natabo.
Si Arnold ang amay duha sini ka bata nga pito kag duha ka tuig.
