Ginatumod pa sang mga militar ang identity sang isa ka katapo sang New People’s Army (NPA) nga napatay sa engkwentro nga nagluntad sa Sitio Cambogui-ot, Barangay Camindangan sa ciudad sang Sipalay, Negros Occidental, kahapon sang aga, Enero 10, 2025.
Sa interview sang Bombo Radyo Bacolod kay 302nd Infantry Brigade Commander Brigadier General Joey Escanillas, nagluntad ang engkwentro sa tunga sang mga remnants sang South West Front kag 15th Infantry Battalion bangod nagpadulong sa area ang militar agud i-verify kag tsekyaron ang report nga may namonitor natuhoy sa grupo sang rebelde sa lugar.
Sa inisyal nga impormasyon nga nakuha sang militar ang napatay ang ginkilala kay Alyas Wanny.
Ginabanta nga indi magsobra sa napulo ka mga katapo sang NPA ang na-engkwentro sang militar nga naglawig sa kapin 25 minuto.
Magluwas sa bangkay sang lalaki nga ginapatihan NPA, narekober sa encounter site ang isa ka M14 rifle kag apat ka bags.
Temporaryo nga ginpauntat ang clearing operations sang mga militar sa encounter site bangud sa pag-ulan.
Wala pa napanaog ang bangkay sang ginapahayag NPA bangud ginahulat pa ang katapo sang Scene of the Crime Operation (SOCO) agud nga maproseso.
Ginalantaw nga subong pa nga adlaw mapanaog ang bangkay sang napatay.
Wala man sang nasamaran sa bahin sang tropa sang gobyerno.
Gin-athag man ni Escanillas nga malayo sa mga pamalay ang encounter site.
