Nagapati ang political analyst nga indi magabunggo si Congressman Greg Gasataya kay Bacolod City Mayor Alfredo ‘Albee’ Benitez sa 2025 Midterm Elections.
Sa interview sang Bombo Radyo Bacolod kay Atty Jomax Ortiz, ang ginbuy-an nga pahayag ni Gasataya sa iya State of the District Address (SODA) kahapon nga ‘continue to watch me work’ ang wala nagakahulugan nga siya ang magapapili bilang alkalde sa nagahilapit nga eleksyon.
Nahibaluan nga matapos na ang termino ni Gasataya bilang kongresista gani ang pinakamalapit nga pwesto nga mahimo sini padalaganan amo ang pagka-alkalde, apang ginalantaw ni Ortiz nga malayo nga magpapili si Gasataya kun si Benitez ang magapare-elect.
Dugang pa sini nga dako ang nabulig ni Benitez sa pagpangampanya ni Gasataya.
Suno diri, kun magbunggo si Gasataya kay Benitez kag magpapili man si former Mayor Evelio ‘Bing’ Leonardia, dako ang tyansa nga magtalang-talang ang mga botante samtang ini ang pabor naman kay Leonardia.
Paathag sini nga nangin leksyon na ang una nga pagbunggu-anay nanday Benitez kag Leonardia nga indi dapat pag-iunderestimate ang kasumpong bangod sadto gin-underestimate ni Leonardia si Benitez sa pagpinsar nga dako ang ila abanse ilabi na nga ini ang indi tumandok sa Bacolod City.
Apang sa pihak sini nangin maragtason ang pagdaog ni Benitez kag nagdangat sa 65,000 votes ang iya abanse.
Nagapati si Ortiz nga may arrangement na sa tunga nanday Benitez kag Gasataya antes paman ang filing sang Certificate of Candidacy sa Oktobre 1 tubtob 8.
Isa sa posibilidad ang pagduso kay Punong Barangay Inday Franz Tiongko sang Barangay Mansilingan nga magpapili sa pagka-kongresista, samtang si Gasataya naman ang irekomendar ni Benitez nga mahatagan sang National Position.
Pahanumdom ni Ortiz nga malapit sanday Benitez kag President Ferdinand ‘Bongbong’ Marcos Jr. gani bisan indi bilang tiglikom, sarang gid sini mapanugyan nga mahatagan sang mataas nga National posts si Gasataya.
